我

最近同友人傾計，得出左一個令我好意想唔到o既結果，就係友人覺得我係一個幾花心o既人。一路以來我都好唔認同自己係一個花心o既人，原因有幾個：1.從來花心都係靚仔靚女ｏ既專利，呢少少o既自知之明我都仲有o既。2.花心要有錢。以我呢個窮光蛋黎講，就算有心都無力。所以我一直都唔認為自己會比人一個花心o既感覺，最少自己亦不可能花心。後來傾返，原來佢覺得我係一個口花花o既人，所以比佢咁ｏ既感覺(佢咁覺係因為佢唔識Ivan，唔知咩叫口花)。老實講，我自問係一個對感情幾認真o既人，老婆同女朋友可以係同義詞。舉個簡單例子，女朋友同老婆就等於資本主義同社會主義ｏ既關係，經過資本主義之後再進入社會主義，係一個過程。

當然，經過左上一段失敗ｏ既戀愛經驗(我形容失敗係因為最後都唔能名開花結果)，我明白到我自己真係有好多缺點。其中最重要就係 - 欣賞。我算係一個幾典型o既處女座，我對身邊人要求好嚴格，總喜歡雞蛋裡挑骨頭，所以同時對身邊人產生好大壓力。所以同時，大家見我成日對個社會，政府，以致生活間所有事都滿肚牢騷，好大程度上係性格使然。但呢種性格，對一段關係黎講並唔係咩好事(相反對我工作就唔錯)，因為好容易會有磨擦。所以我而家好努力去學習另一樣野，就係appreciation－欣賞。工作上要多欣賞義工，朋友間要多欣賞對方。亦希望下一段戀情黎ｏ既時候會多欣賞佢，搵下對方優點。咁樣先可以長久咁建立關係。

講返花心，另一方面，我好討厭做人兵仔，我好強調一樣野，唔鍾意唔緊要，男歡女愛，你情我願。最重要係唔好比對方有多餘幻想，成日欲拒還迎咁算乜？你係對對方有意思，覺得對方係一個可以發展ｏ既人，先好向對方釋出善意。太好心，唔拒絕最終只會令對方傷得更深。我深信，你拒絕得對方愈直接，對方愈容易抽身。所以我好衷心同我身邊所有女性朋友講，唔好做收兵呢ｄ咁缺德o既行為(做老師果幾位，收男學生做兵又例外，我好鼓勵女老師收兵仔)。好彩我身邊靚女真係唔少，又未見到有邊位係成日想收兵。

最後，我都想同果位朋友講聲，我出街成日周圍望唔係(單純)為左"目及女"，我係留意緊身邊發生緊咩事，有咩變化。即使退一萬步，男士上街睇靚女並唔代表佢出軌，正等於女仔見到靚野都會望多兩眼，That's it.仲有，老實講，有時見到ｄ自暴其短ｏ既人我都會望兩眼，然後心諗:嘩，做乜Ｘ呀？